विराट आणि मिताली आयसीसी वनडे क्रमवारीत अव्वलस्थानी !

नवी दिल्ली : आयसीसीच्या वन-डे क्रिकेट क्रमवारीत भारतीय खेळाडूंनी पुन्हा बाजी मारली आहे. भारतीय पुरुष क्रिकेट संघाचा कर्णधार विराट कोहली व भारतीय महिला क्रिकेट संघाची कर्णधार मिताली राज यांनी आयसीसीच्या जागतिक वन-डे क्रमवारीत फलंदाजांच्या यादीत अव्वल स्थान मिळवले आहे. दक्षिण आफ्रिकेच्या एबी डिव्हीलियर्सला मागे टाकत विराट कोहलीने पहिलं स्थान पटकावलं आहे. न्यूझीलंडविरुद्ध अखेरच्या वन-डे सामन्यात विराट कोहलीने केलेल्या शतकी खेळीचा त्याला क्रमवारीत पहिलं स्थान मिळवून देण्यात उपयोग झाला आहे.

तर दुसरीकडे भारतीय महिला संघाची कर्णधार मिताली राजही महिलांच्या क्रमवारीत पहिल्या क्रमांकावर पोहचली आहे. ७५३ गुणांसह मिताली राजने क्रमवारीत पहिलं स्थान पटकावलं आहे. ऑस्ट्रेलियाची एलिस पेरी ७२५ गुणांसह दुसऱ्या तर न्यूझीलंडची अॅमी सॅटरवेट ७२० गुणांसह तिसऱ्या स्थानावर आहे. महिला विश्वचषकात केलेल्या खेळीचा मिताली राजला फायदा झाल्याचं दिसतंय.

याआधी भारताकडून सचिन तेंडुलकरने फलंदाजांच्या क्रमवारीत पहिलं स्थान पटकावलं होतं. सध्या विराटच्या खात्यात ८८९ गुण असून एबी डिव्हीलियर्सच्या खात्यात सध्या ८७२ गुण जमा आहेत. १९९८ सालात सचिन तेंडुलकर ८८७ गुणांसह आयसीसीच्या वन-डे क्रमवारीत पहिल्या स्थानावर राहिला होता. यानंतर विराट कोहलीने केलेली ही कामगिरी सर्वोत्तम मानली जात आहे.