रद्द भारतीय पासपोर्टवर नीरव मोदीची जगभ्रमंती !

लंडन : पंजाब नॅशनल बँक (पीएनबी) घोटाळ्यातील मुख्य आरोपी नीरव मोदी यानं लंडनमध्ये राजाश्रयाची मागणी केल्याच्या वृत्तानंतर आता तो ब्रसेल्सला पळून गेल्याची माहिती समोर येतेय. रिपोर्ट्सनुसार, नीरव हा भारताच्या नव्हे; तर सिंगापूरच्या पासपोर्टवर ब्रसेल्सला पसार झाला आहे. तर सूत्रांच्या माहितीनुसार, नीरव हा रद्द भारतीय पासपोर्टवरच बिनदिक्कतपणे विदेशवाऱ्या करत असून, त्याबाबत कुणालाही माहिती नाही. त्यामुळेच त्याला विदेशांमध्ये बिनदिक्कत प्रवेश मिळतो आहे!

सीबीआयने सोमवारी नीरव आणि त्याचा भाऊ निशालच्या विरोधात रेड कॉर्नर नोटीस जारी करण्याची मागणी इंटरपोलकडे केली होती. नीरवचा भाऊ निशाल हा बेल्जियमचा नागरिक आहे. तर मुंबईच्या विशेष न्यायालयाने नीरव आणि त्याच्या कुटुंबातील सदस्यांविरोधात अजामीनपात्र वॉरंट जारी केला होता.

नीरवच्या पासपोर्टवरून त्याने ३१ मार्चपर्यंत कुठेही प्रवास केल्याची माहिती नाही. त्यामुळे तो निश्चितच भारतीय पासपोर्टचा वापर करत नाही, अशी माहिती इंटरपोलकडून भारत सरकारला देण्यात आल्याचं सूत्रांनी सांगितलं. तो सिंगापूरच्या पासपोर्टवर प्रवास करत असेल, तर या प्रकरणात भारत सरकार काहीही कार्यवाही करू शकत नाही, असंही सूत्रांचं म्हणणं आहे.

”नीरव भारतीय पासपोर्टचा वापर करत आहे की नाही, याबाबत आमच्याकडे कोणतीही माहिती नाही,’ असं लंडनमधील भारतीय दूतावासातील सूत्रांनी सांगितल्याचे कळते. नीरव सिंगापूरच्या पासपोर्टवर प्रवास करत असल्याचं ऐकण्यात नाही. पण त्यानं बनावट भारतीय पासपोर्ट तयार केले असावे किंवा तो रद्द पासपोर्टवर प्रवास करत असावा, असा अंदाजही सूत्रांनी वर्तवला आहे.