यूपीएससी परीक्षेत कॉपी करतांना आयपीएस अधिकाऱ्याला अटक

ips-officer-cheating

चेन्नई: केंद्रीय लोकसेवा आयोगाच्या (यूपीएससी) मुख्य परीक्षेत एका आयपीएस अधिकाऱ्याने ‘मुन्नाभाई स्टाइल’ कॉपी केल्याचा धक्कादायक प्रकार चेन्नईतील इगमोर येथील परीक्षा केंद्रावर उघडकीस आहे. मोबाइलवरून ब्लूटूथद्वारे पत्नीशी संपर्क साधून पेपर सोडवताना या अधिकाऱ्याला अटक करण्यात आली आहे.

करीमने गुन्ह्याची कबुली दिली आहे. हैदराबादमधील पत्नीला मोबाइलवरून प्रश्नपत्रिकेचे फोटो पाठवले. या प्रश्नांची उत्तरे ती सांगत होती, अशी माहिती त्याने चौकशीत दिली. या प्रकरणी करीमवर गुन्हा दाखल करण्यात आला आहे. त्याच्यावर बडतर्फीची कारवाई करण्यात येईल, अशी माहिती पोलिसांनी दिली.

माहितीनुसार, साफीर करीम असे या कॉपीबहाद्दर आयपीएस अधिकाऱ्याचे नाव आहे. तो सध्या तिरूनेलवेल्लीतील नानगूनेरी येथे सहायक पोलीस अधीक्षकपदी कार्यरत आहे. तो यूपीएससीची मुख्य परीक्षा देत होता. परीक्षेवेळी त्याने मोबाइलवरून ब्लूटूथ आणि हेडफोनद्वारे हैदराबादमध्ये असलेल्या पत्नीशी संपर्क साधला आणि तिच्याकडून मिळालेली उत्तरे लिहून घेत होता. त्याचवेळी त्याला पकडण्यात आले, अशी माहिती अधिकाऱ्यांनी दिली. या प्रकरणी पोलिसांनी तिलाही अटक केली आहे. करीमला आयएएस अधिकारी व्हायचे होते. त्यामुळे तो पुन्हा यूपीएससीच्या परीक्षेला बसला होता, अशी माहिती त्याच्या मित्राने दिली.