विजय मल्ल्या सारखे स्मार्ट बना ! – ना. ज्युएल ओराम

हैदराबाद: बँकांना लुबाडून प्रदेशात पळालेल्या मद्यसम्राट विजय मल्ल्यापासून प्रेरणा घेण्याचा अजब सल्ला केंद्रीय आदिवासी मंत्री आणि भाजपा नेते ज्युएल ओराम यांनी आदिवासी बांधवांना दिला आहे.

हैदराबाद येथील पहिल्या राष्ट्रीय अनूसूचित जमाती उद्योजक संमेलनाला ते संबोधित करत होते .
‘केवळ हार्ड वर्कर बनू नका; फरार उद्योगपती विजय मल्लयासारखं स्मार्ट बना,’ असा सल्ला जुएल ओराम यांनी दिल्यामुळे आश्चर्य व्यक्त केले जात आहे.

‘चुकीची कामं करण्यापूर्वी विजय मल्ल्याने उद्योग क्षेत्रात यश मिळविले होते. त्याने त्याचा उद्योग स्थिरस्थावर केला होता. त्यामुळे त्याच्याकडून प्रेरणा घ्यायला हवी,’ असं ओराम म्हणाले.

‘तुम्ही विजय मल्ल्याला शिव्या देता. पण मल्ल्या कोण आहे? तो एक स्मार्ट व्यक्ती आहे. त्याने बुद्धिमान लोकांना कामावर ठेवले आणि बँका, राजकारणी आणि सरकारला आपल्या कामाने प्रभावीत केले. असं करण्यापासून तुम्हाला कोण रोखतं? व्यवस्थेवर प्रभाव पाडण्यापासून कोणीही तुम्हाला थांबवलेलं नाही,’ असंही ते म्हणाले. आदिवासींनी आरक्षणाचा फायदा घेत शिक्षण आणि उद्योग क्षेत्रात चांगली कामगिरी करावी, असं आवाहनही त्यांनी यावेळी केलं. यावेळी आदिवासी समाजातील एक हजाराहून अधिक उद्योगपती उपस्थित होते.